7 hakbang tungo sa pagiging tagasalin

Halos lahat ng nagsisimula sa propesyong ito ay nahaharap sa karaniwang mabisyong siklo: humihingi ng portfolio ang potensiyal na employer, pero para makabuo nito, kailangan munang makahanap ng trabaho. Paano makalalabas sa siklong ito? May 7 karaniwang paraan at rekomendasyon. Isa-isahin natin ang mga ito.

1. Pumili ng wika at pag-ukulan ito ng buong pagsisikap sa pag-aaral

Karamihan sa mga mambabasa namin ay nakapili na ng wika, pero hindi kailangang dito na lang tumigil—maaari pang mag-aral ng isa pa. May dalawang dapat isaalang-alang sa pagpili ng wika. Sa isang banda, mas maraming bakanteng trabaho para sa mga tagasalin ng mga karaniwang ginagamit na wika, pero mas matindi rin ang kompetisyon. Ang alternatibo ay ang pagpili ng isang di-karaniwang wika. Mas kaunti ang mga bakanteng trabaho, pero hindi naman ganoon katindi ang kompetisyon. Kaya makabubuting pag-aralan ang kalagayan ng labor market sa larangan ng pagsasalin.

Kung interesado kayong magtrabaho sa mga larangang pandaigdig, gaya ng diplomasya, makabubuting pumili ng isa sa mga opisyal na wika ng UN: Arabic, Chinese, French o Spanish. At, siyempre, Russian.

Kapag nakapili na kayo, isakatuparan ang desisyon at pag-aralan ang wika hanggang sa pinakamataas na antas. 

2. Hasain ang sining ng pagsasalin

Kahit bihasa kayo sa isang wika na parang katutubong tagapagsalita, hindi ibig sabihin nito na isa na kayong tagasalin. Kailangan ng espesyal na pagsasanay para maunawaan at maipahayag ang mga kahulugan. Makakatulong dito ang mga samahan at unyon ng mga tagasalin. Nagkakaiba-iba ang mga ito sa bawat bansa at para sa bawat wika. Ang pakikipag-ugnayan sa mga ito ang magsisilbi ring unang hakbang tungo sa «kapatiran ng mga tagasalin». Maaari nang sumali sa mga patimpalak ng iba’t ibang «unyon ng mga tagasalin» habang nag-aaral pa lamang. May mga ganito rin sa Russia.

3. Kumuha ng sertipikasyon

Ang susunod na hakbang ay ang sertipikasyon. Magandang dagdag sa résumé ang mga dokumentong nagpapatunay sa inyong mga kasanayan bilang tagasalin. Makakatulong din ang sertipiko sa larangang pinili ninyong pagsasalinan. Halimbawa, malinaw na ipinapakita ng diploma sa abogasya o ng kwalipikasyon bilang manggagawang pangkalusugan na may alam kayo sa industriyang pinagsasalinan ninyo.

4. Pumili ng larangan ng pagsasalin at pag-aralan ang mga katawagang ginagamit dito

Pinatataas ng espesyalisasyong propesyonal ang tsansang maibenta ninyo ang inyong mga kasanayan sa labor market. Maraming kurso, mapagkukunan sa internet at akademikong babasahin ang makakatulong sa pag-aaral ng mga detalye.

5. Maging bihasa sa paggamit ng computer

Mahalagang alam ninyo ang mga «shortcut key» at kung paano maghanap sa internet. Isa pang mahalagang bagay ang mga CAT system, o computer aided translation. Hindi madaling gamitin ang mga application na ito, pero lubhang kapaki-pakinabang ang mga ito. Isa itong kasangkapan sa trabaho na makakatipid ng oras at makapagbibigay ng kita.

6. Mag-ipon ng karanasan

Pag-usapan natin ang pinakamahalaga: paano mag-ipon ng karanasan nang hindi pumapasok sa trabaho. Isang mabuting hakbang ang mag-freelance. Sa mga palitan ng trabahong pagsasalin at iba pang platform, maningil muna ng bayad na naaayon sa karanasan ninyo, na sa ngayon ay limitado pa. Maaari ring mag-intern sa mga online tutor. Kasama sa maituturing na karanasan ang pagbo-voice-over ng mga podcast at pag-transcribe ng mga video sa wikang pinag-aaralan—kahit hindi pa ito nagbabayad nang kasing laki ng inaasahan. Magandang opsyon din ang pagtanggap ng mga order mula sa mga kakilala.  

7. Mag-aral pa ng mga wika

Kapag umusad na ang inyong karera bilang tagasalin, pag-isipan ang pag-aaral ng ikatlong wika, at marahil ay pati ng ikaapat o ikalima. Habang dumarami ang mga pares ng wikang nakalista sa résumé ninyo, lalo ring tumataas ang tsansang makakuha ng magandang proyekto o makahanap ng permanenteng trabaho.

Mga konklusyon. Bawat isa sa mga puntong nabanggit ay malawak at nangangailangan ng maraming pagsisikap. Pito ang mga ito, at habang pinag-aaralan ninyo ang mga ito, maaari pa kayong makadagdag ng sarili ninyong mga aral na pinaghirapan. Huwag magpakampante!